Davart mai

Tgi sun jau?
Mes num è Prisca Derungs ed jau sun creschida si en il chantun Grischun en Val Lumnezia, val da la glisch, (là ha lieu mintg’onn la stad il pli grond festival da musica dal Grischun). Ils abitants da la vischnanca da Lumnezia èn passa 90 % da lingua rumantscha. Ina considerabla part da la scolaziun hai jau frequentà per rumantsch. En la scola primara vegnivan tut ils roms instruids en rumantsch (sursilvan), cun l’excepziun da 4 lecziuns tudestg per emna da la 4. fin la 6. classa. Al stgalim aut hai jau gì per gronda part tudestg sco lingua d’instrucziun, cun l’excepziun da 2 lecziuns rumantsch per emna da la 7. fin la 9. classa e 2 lecziuns franzos en la 7. sco era 8. classa e 3 lecziuns englais en la 9. classa.

Suenter la scola obligatorica hai jau absolvì a partir da l’onn 2002 la furmaziun sco emploiada da commerzi en detagl en il Coop Glion en la sparta alimentaziun. Durant ils trais onns da furmaziun tutgavan tar l’instrucziun da la scola professiunala era 2 lecziuns talian per emna. L’onn 2007 hai jau fatg in segiurn linguistic da sis mais en l’Australia, il 2008 sun jau stada per dus mais en il Giapun, il 2010 ha jau frequentà ina scola da lingua taliana durant trais mais en l’Italia e l’onn 2012 ina scola da lingua englaisa durant in mais en l’Engalterra.

L’atun 2010 hai jau cumenzà la direcziun da studi translaziun cun tudestg sco lingua materna ed englais e talian sco linguas estras a la SAL (scola spezialisada superiura per professiuns linguisticas) a Turitg che jau hai terminà cun success la primavaira 2016. Il 2013 hai jau dastgà far in praticum da tschintg mais en il servetsch da translaziuns rumantsch en la Chanzlia chantunala dal Grischun. Silsuenter èn suandads engaschaments temporals tar la Lia Rumantscha (organisaziun da tetg da tut las uniuns linguisticas rumantschas) sco translatura/correctora. Ils onns 2016/2017 hai jau dastgà surpigliar differentas incumbensas da translaziun e da correctorat per la Hogrefe AG (chasa editura da cudeschs spezialisads per la sanadad). Dal settember 2017 fin il favrer 2018 hai jau lavurà sco coordinatura da projects tar il biro da translaziuns Datawords a Paris. Dapi il mars 2018 surpigl jau sco collavuratura independenta incumbensas da Datawords.