Domenas dal fatg

Alimentaziun, sanadad, sport, film e musica

Alimentaziun
Tras mia furmaziun sco emploiada da commerzi en detagl en la sparta alimentaziun hai jau frequentà lecziuns da mercologia davart quest tema. Pervia da bleras intoleranzas sai jau tge consequenzas che tge aliments pon chaschunar e da tgenins ch’ins duess desister, sch’ins ha tscherts malessers (p.ex. duess ins evitar fritgs, sch’ins ha arsira dal magun, perquai ch’els augmentan il problem, schebain ch’els fissan atgnamain sauns).

Sanadad
Jau suffresch dapi onns da neurodermitis (malsogna da la pel) ed enconusch perquai bain la domena pel. Ultra da quai hai jau absolvì in praticum da quatter mais a Berna tar Hogrefe, la chasa editura spezialisada per la sanadad . Plinavant lavuran blers da mes amis en il sectur da tgira.

Sport
D’uffant eri tradiziun en mia famiglia da guardar sport a la televisiun. Perquai che mes bab e mes frar eran fitg interessads da ballape, ma na restavi quasi nagut auter ch’era da guardar. L’enviern gievi a la televisiun adina cursas da skis. La fin d’emna guardav’ins emissiuns da sport. Per quests motivs ha jau pudì rimnar ina vasta savida da sport.

Film
Films e serias m’han gia adina fascinà e per quest motiv passentava jau d’uffant probablamain er in zic memia bler temp davant la televisiun. Durant mes studi da translatar hai jau elegì tecnica da film e video sco champ spezial. Jau hai scrit ina lavur da terminologia sur da midaders da maletg (vegnan duvrads per sistems da registrads maletgs). Per la lavur da diplom hai jau translatà in text che sa tracta da tecnicas da films 3D e scrit sur da metodas pussaivlas da translatar titels da films.

Musica
Cun otg onns hai jau emprendì per l’emprima giada in instrument: la flauta. Dus onns pli tard hai jau emprendì co ch’ins suna il cornet (ina pitschna trumbetta). Suenter hai jau sunà plirs onns en la musica giuvenila da la val ed en la musica dal vitg. Per quest motiv sai jau leger notas e sai co ch’ina societad da musica è cumponida e tge ch’è impurtant.